20‏/11‏/2008

life remix

اكتر فكرة مسيطرة عليا الأيام دى انى ابدل روحى مع حد ليه ماجربش اعيش حد غيري بتفاصيل مختلفة؟
نفسى اجرب اعيش مثلا دكتور جامعة ب
IQ
عالى وتتابع افكار سريع ويوم منظم وهدف واحد محدد فى دماغه.
بنت فى جامعة امريكية اصحابها كتير ومشكلتها الاساسية حقوق الحيوانات الضالة فى شوارع مصر .
صحفى مشغول يجرى ورا الخبر يكتبه حلو يتنشر له مقالة هنا وهنا .
كاتب يألف رواية بايقاع سريع واسلوب جديد موجز من غير مط ولا كلاسيكية
تفاصيله نفسية او شكلية ذات ابعاد نفسية
زى سيجارة فى بوق مثقف باسنان صفرا او مراهق شعره لزج بكيلو جيل على راسه
وام بى ثرى مولود بيه كعيب خلقى فى ودانه
او الخمس ست طرح متعددى الالوان اللى بتلفهم بنت فى المجمع النظرى ولسه برضه الشعر الغجرى المجنون باين
والاكلادور الاسود اللى بيفكرنى بالساحرة الشريرة .
او اكون طالب طب مجتهد يحضر الروند الصبح يذاكر الضهر ويدون بالليل .
بنت جميلة اوى مابتكلمش اى حد فيقولوا عليها مغرورة ويتعرف عليها الجان زى فى الحواديت
ويعرف قد ايه هى طيبة ورقيقة وبتساعد المحتاجين .
بنت وحشة اوى بس شخصية اخت الكل البنات تحبها عشان اوحش منهم والولاد تحبها كأنها واحد صاحبهم.
حابعد عن الامهات عشان مشاعرهم حقيقية زيادة عن اللزوم ومش حاعرف ابدلها.
عاوزة اجرب اكون ولد صغير بيعرف كمبيوتر حلو اوى يقعد على اللعبة يخلصها فى ساعتها بيحب الكرتون ومسلسلات الست كوم فى ديزنى تشانل .
او بنت صغيرة بتشترى بسكوت وبالونة حمرا وهى راجعة من المدرسة تكتب واجبها وتلعب بالبالونة
تبوس مامتها بحماس وتاخد اكبر حضن وتحلم بسحاب غزل بنات بمبى
وملايكة بيضا تأكلها رز بلبن ومهلبية زيادة عشان حماس البوسة .
اجرب اكون دكتور امتياز نحلة فى الاستهبال اقصد الاستقبال يشوف ده ويضحك مع ده
يقيس ضغط ياخد غرزتين يعمل رسم قلب ويقراه يثبت حالة ازمة قلبية
يتعامل صح ....يقرب من ولد صغير مدمن يطلع اهله بره ويسأله انت بتشم ايه؟
يخليه يثق فيه فيكر له تاريخ حياته كله .
عاوزة اكون ولد فى ثانوى يوم الخميس يرمى مذكرات الدرس جنب اقرب حيطة ويلعب ماتشين جامدين
وكام دور كونكر ويختم الليلة بسندوتشات كبده من اقرب عربية على اول شارعهم
فى الغالب حيشرف عند دكتور الاستقبال تانى يوم .
عاوزة اكون فى شلة اصحاب بتصيف فى خالد بن الوليد تنزل من الصبح على البحر
تلعب راكت على الرملة اللى جرى عليها صعب
تقضى الليل ورا القلعة تاكل حمص الشام وتشرب شاى تسمع ام كلثوم على عمرودياب
اوهانى شاكر وميادة الحناوى كعقاب لو مادفعوش بقشيش كويس
او يدخلوا الحفلة المجانى اللى فى القلعة بيجيبوا ناس غريبة بس اهى هيصة وخلاص .
اكون طالبة فنون جميلة اشيل اللوح الاسمر الضخم اروح متحف التشريح فى كلية طب
اقعد على الارض ارسم العضم بتركيز اكتر من طالب طب اللى جنبها
بيحاول يحفظها ويبص كل شويه على رسمها
او اروح المتحف المصرى اقعد على الارض برضه
_باحب اللى بيرسم على الارض _ارسم القطة السوداء بعيونها الواسعة
تحسسك انها مرقباك من ساعة مادخلت
اكون مرشدة متأنتكة لابسة شيك وباتكلم شيك فرنساوى وتكون اللوحة اكتملت
اكون اسراء صاحبتى مانيكان ببابي فيس اشترى هولز الحمرا والمصرى اليوم الروند كله يقراها قبلها
بتحسب يومها بالدقيقة وبتابع مسلسل نور ومهند بحماس بالرغم من انها بتكره مهند
اكون مدرسة فى حضانة اقول
APPLE ......A
ويردوا ورايا اجاوب على اسئلتهم البسيطة بثقة
عشان عارفة انهم حيصدقونى الحقهم قبل مايكبروا ومخهم يتخن ومايصدقوش اى حاجة
اعلمهم الاكسليفون واغنى معاهم ماما زمانها جاية ........والديك الشركسى صاحب جارتنا راندا...
...وفى حصة الدين اعلمهم سورة الفاتحة ومحمد نبينا
اكون مربية اطفال فى بيت امريكى فى القرن 18 اعلمهم البيانو والتاريخ والاتيكيت
اشربهم الشيكولاتة السخنة الساعة 5 واقرا لهم ادب شكسبير جنب الدفاية
واخدهم لما التلج يجمد للتزحلق وياكلوا ابو فروة
واروح حفلة راس السنة لابسة فستان منفوش وحاطة بروش فرعونى على شكل عين الحياة من الجعران الاخضر
ارقص كلاسيك يترفع لى القبعة وياخدوا منى الشال الفرو اقلع الجوانتى الابيض الطويل بذوق وانحنى
اكون بنت فى فيلم عربى قديم بتبص من ورا المشرابية
على جنب راسها ضفيرة سميكة وقوية تاكل مفتقة عشان تبقى مليانة ومبرومة
تبص من ورا باب اوضتها على الدلالة وهى بتجيب هدوم الجهاز
وتاخد صورتها تضمها لالبوم العرايس ومن الآخر مش عاوزة اطول فى روح البنت دى كتير عشان حتعارك معاها

هناك 17 تعليقًا:

yas يقول...

تخيلى انا بردو نفسي اغير حياتى مع اى حد وبعيش فى الاوهام والاحلام دى كتير
بس ليه منيش حياتنا يمكن تكون حوة ومش واخدين بالنا وفيه ناس تانية عايزة بردو تعيش مكانا

حـــــدوتـــــة يقول...

السلام عليكم

يا شيخة حرام عليكى
ده انا دخت وانا بقرأ الموضوع
امال انتى هتعملى كل الحاجات دى ازاى
صدقينى هتلفى وتدورى وتتمنى ترجعى حياتك تانى

سلالالالالالالالالالالالالالالالالالالالالالالالالام

DR.HAMAS يقول...
أزال المؤلف هذا التعليق.
DR.HAMAS يقول...

يااااااااااه

كل ده

بس بجد ما شاء الله على عقلك و تخيلك

نماذج مختلفة و وقائع حقيقية

انا كتير بصيت لغيرى و قلت لو انا كنت ده

و أرجع ألاقينى أحسن

و ربنا أعطانى أفضل

مش لأنى أجمل واحد
و لا أغنى واحد
و لا أذكى واحد


لكن عشان ربنا اختار انى أكون أنا

فانا بحبنى

لأنى صنعة الرحمن

و هكذا أنشأنى

و أحب ما يحب

ربنا يكرمك على الفكرة اللى بجد جميلة

ان الواحد يحاول يعيش غيره

لكن انا بختار أنا





د.حماس

Unknown يقول...

خيالك خصب اوى
حلوة التخيلات دى
بس صعبة التحقيق

كلام وخلاص يقول...

ياسمين :اخبارك ايه؟ فينك من زمان مابتكتبيش
اكيد فيه ناس كتير عاوزة تعيش مكاننا لانهم مش احنا
حياتنا اكيد فيها تفاصيل حلوة والمفروض ندور عليها ونعيشها عارفة احنا ممكن نعيش التفاصيل دى ببساطة من غير ما نكون حد تانى بس ده فن عاوز روقان
***********************************
حدوتة
الف سلامة عليك من الدوخة
عارف فيه قصة ليحيى حقى اسمها كن كان بتتكلم عن حد جرب فعلا يغير حياته ويعيشها بتفاصيل تانية وعرف قد ايه ان الفيصل مش انك تكون حد تانى الفكرة انك تتمتع باللى عندك وانا عارفة ده كويس والحمد لله راضية بحياتى

كلام وخلاص يقول...

دكتور حماس :عجبنى اوى فكرة انا عاوز اكون انا لانى صنعة الرحمن
شرفتنى زيارتك وتعليقك يا دكتور
*****************************
نهر الحب
شكرا لرأيك عارفة ممكن تجربيها لما تقرأى كتيييير ده بيخليك تعيشى تفاصيل اكتر

walaa tulip rose يقول...

ياااااااااااه
لو بس بايدينا نغير كنا كلنا غيرنا
تعرفي في يوم من الايام فكرت بالشكل ده
وكنت بالقوة اللي خلتني اجرب بجد
وسافرت وجربت اعيش حياة غير حياتي بشكل غير شكلي
هو برضه جوا مصر لاكن بعدت عن التفاصيل الحياتيه الخاصة بيا واللي بترسمني زي ما انا كده

لاكن تصوري اني رجعت قبل ما اكمل اسبوع
والسبب كان واضح قدامي جدا وقلته لكل اللي باحبهم اما رجعت
السبب كان (( لو اطلعتم علي الغيب لاخترتم الواقع ))
كل الموضوع اننا اما بنعيش تفاصيل غير تفاصيل حياتنا بنعرف سلبياتها واجابيتها وبتتضح قدامنا حياتنا برضه بالسلبيات والايجابيات
ووقتها بنحبها ونلاقي نفسنا بنضحك علي صور حياة الاخرين لاننا نراها من زواية واحدة فقط

بجد مدونتك رائعة وعارفة اني طولت عليكي لاكن البوست ده رجعني افكر ازاي تفاصيل حياتي مهمة وحببني فيها لان كلماتك صادقة اوي وخارجة من جوااا اوي
ربنا يوفقك يارب

yas يقول...

طيب امتى هنروق بقي
بنأجل الموضوع ده كتير لحد مانلاقي حياتنا ضاعت من بين ايدينا
يارب اروق بقي
بقالى كتير مكتبتش علشان معتش بشعر بالسعادة وانا بكتب شكرا لسؤالك

!!! عارفة ... مش عارف ليه يقول...

كلنا هذا الرجل

ولابد أن نبحث عن صيغة توافقيه

حتى نتصالح مع أنفسنا

تحياتي
وليد

محمد حلمي مخلوف يقول...

تعرفي فيه روايه لأورهان باموق (تركي حاصل علي نوبل 2006) روايه رائعه اسمها القلعه االبيضاء بتتكلم عن نفس مشاعرك تبادل الادوار اتمني انك تقرأيها
هي نازله في سلسله الجوائز مكتبة الاسره بسبعه جنيه ونص
سلام

كلام وخلاص يقول...

ولاء:
الاول انتى تطولى براحتك لان كلامك جميل فى الغالب هو ده طبع الانسان لازم يجرب الاول عشان يقتنع ويبص من فوق عشان يشوف الصورة اوضح
انا يمكن اكون طماعة لانى عاوزة اجرب تفاصيل كتيير بس ده مش معناه انى مستغنية عن اللى عندى بالعكس الحمد لله عارفة ان نعم ربنا علينا كتييييييير جدا ربنا يقدرنا ونوفى شكرها
ربنا يكرمك يارب على كلامك الجميل والمدونة بجد بقت جميلة بتعليقك

كلام وخلاص يقول...

ياسمين : مشكلة انك كلامك صح والله يعنى فعلا الوقت بيتسحب من تحتنا من غير مانحس
تصورى عن الروقان مش واضح فى الدراسة باقول الكلية بتاكل الوقت فى الصيف باضطر انزل تدريب ويبقى وراي كتير لازم يتعمل
عارفة احنا لازم نعمل
pause
شوية ونجرب نعيش التفاصيل
انا عارفة كويس ازاى ممكن ماتحسيش بسعادة وانتى بتكتبى عارفة بجد انا باحب نفسى وانا باقرا اكتر من وانا باكتب المهم انك تعملى حاجة بتحبيها
كل ده كلام انا كده اثبت ان البنات رغايين

كلام وخلاص يقول...

عارفة ...مش عارف ليه:
وليد من فضلك ايدك على الصيغة التوافقية دي وليك الحلاوة

كلام وخلاص يقول...

محمد حلمى : حاضر حاقراها
دايما بتجيب المفيد

MaGnOnA eLdOnYa يقول...

عارفة ممكن في حياتك نفسها تعيشيها بالطريقة اللى انت عايزاها بس ساعات في حواجز بتمنعنا زى الظروف اللى اتولدنا فيها لكن ساعات بنقدر نجرب نعيش شخصية تانية فانا مثلا جربت حياة الصحافة بحكم تخصصى ودلوقتى بجرب حياة الباحثة اللى مبتتخلعش الكيبورد من ايديها الا فترة البريك وبس والنوم طبعا ههههههههه وكان قبليهم جربت اعيش حياة الفنان التشكيلى وجو الفرش والالوان والموسيقي والفضاء الخارجي .. فممكن بجد تلاقي نفسك جو حياة تانية ممكن تستمرى فيها وتحبيها او تملي منها وتعلنى التمرد وطالبى بالتغيير ..

غير معرف يقول...
أزال أحد مشرفي المدونة هذا التعليق.