31‏/12‏/2008

لغزة



لا املك غير الدعاء

واللهم اهدنا إلى ما اُختلف فيه من الحق

اعتذر عن دقيقة الحداد التي لم تمضى اليوم كما يجب واعتذر أنى لم اقدم سواها

24‏/12‏/2008

متلازمة


المجد لل
(community)
زرنا اسكندرية كلها بالطول والعرض وفقا لترتيباته في اسبوعين .

مابين الحضرة وجليم وسان استيفانو والمطار والابراهيمية وبحري للحضرة مرة اخرى.

الخلاصة يمكنك ان تقدر حياتك بعمق بعد زيارتك لمستشفى . طالما انت غير مريض فمشاكلك رفاهية .

زيارات الحضرة دسمة في الحميات هيرودوت صاحب العبارة الدعائية المستهلكة
(مصر هبة النيل )

جدد نفسه معنا مرة اخرى بجملته الاكثر سريان على مصر

Men In Egypt Menstruate & Get Pregnant

الجملة في سنة 3لخصت لعنة البلهارسيا و في سنة 4لعنة فيروس سى ومين يزود؟

ساتجنب مشاعرى الخاصة عن مدرسة النور للمكفوفين ودار الحنان لاعادة الـتأهيل لذوي الاحتياجات الخاصة

لكني لا استطيع تجاهل زيارة مستوصف الصدر خصوصا في هذا التوقيت.

في نهاية العام الماضى مرض عمى بصدره وتوفاه الله قبل حتى ان يتم تشخيصه

يوم وفاته ظل موبايله النوكيا 1112 يرن باصرار فى درج أبى كنت خائفة المسه وارد

كان اول معرفة مباشرة بينى وبين الموت

يومها نصف بكائي خوف على ابى وحزن على حزنه المكتوم ابى لا يبكى ابدا

والنصف الاخر لاننا لم نعرف عمى _رحمه الله _ ولم يعرفنا .

مع نهاية هذا العام ازور مستوصف الصدر واحاط بنفس تفاصيل العام الماضى

اعتبرها صدفة قوية ان يتعطل موبايل المعيدة _اكيد غالى _ وتظل الراوند بطوله تنفى عنها ملكية النوكيا 1112

الذى اضطرت لاستخدامه كأنه تهمة ويظل يرن بنفس الرنه المصرة .

عمى الغائب دائما بين سفر خارج مصر وسفر داخل مصر لم يكن ليعرفنى لو رأنى فى الشارع

اظهر حضورا قويا فى ايامى السابقة لاعتبر النهاية لعامين متتاليين متلازمة الصدر وعمى ونوكيا 1112

12‏/12‏/2008

فصل غير مكتمل

هي: النهاية مريحة.....حد فاصل قبلها احتمال و جايز وممكن
و بعدها اكيد ولازم ولابد
هو : المتعة في الاحتمال...... المجهول عنصر تشويق أساسي في اللعبة

عشان فيه مجهول لازم يتعرف احنا عايشيين
هى: صح بعد النهاية كله سيان ....الميت مش حيستفيد بالوردة الحمرا على قبره

(قطع)

الناس في عينها أنواع نوع
Inert
زى ما يدخلوا حياتنا زى ما يطلعوا
ديكور ممكن تستغنى عنه بسهوله
و ناس بيوجهوا منحنى المشاعر لفوق
ممكن بعد عمر كل ما تفتكرهم تعلى بكلامهم
و ناس تشدك لتحت باستمرار
متعاقدة مع الجاذبية عشان تفضل قريب منها
وكان هو المثال الأوضح عليهم كلهم

(قطع)
ادريس في (قصة حب) شبّه طيبة اخته العانس
ببياض جدران المطبخ الصغير
و كل مكان ما يسعش غيرك انت و نفسك
ممكن تعتبره اخت عانس اكبر منك
بتسمعك بطيبة أم جنبت شراسة الخوف
اللى الامهات بتمارسها على اولادهم ....
و هو كان بيشوفها كده

(قطع)

لما يكون عمرك عشرين مش حيكون عندك كتير تفتكره
و كل اللى حتجيبه عن طفولتك حيبقى ملفوف بدانتيل أبيض شفاف
من تفكير طفولي وعين مداها مش جايب ابعد من ايد امك وابوك
المرافقين ليك في كل المشاهد

(قطع)

انا باحب احكيلها عن الحاجات اللى كانت بتدفينى .....
عن القعدة ع الارض جنب براد الشاى السخن
اللى جدتى بتلفه جنبها في فوطة الصبح عشان ما يبردش.....
وعن تل الرمل في بلدنا اللى بنسميه الكوم....
فعلا انا كنت بانسى التعب و النهجان بمجرد ما اطلع
و اقعد املى الشوال اللى حتزحلق عليه لتحت تانى بمتعة مالهاش زى ...
السما دايما كانت بتكبر وتوسع كل ما ابعد عنها

(قطع)

انا فيه علاقة عكسية بينى وبين ألبوم الصور
كل ما اكبر كل ما الصور تقل و استغرب نفسي ..
تقريبا بابا خلص كل موهبه التصوير عليا
في اول خمس سنين من عمرى .....
كنت باطلع شبه عروستى القماش اللى كانت شبهى بالظبط
أمي بتحب تلعب مع اللى يشوف الصورة اول مرة
وتقوله يطلع الحقيقية من اللعبة .....
لما لعبتها معاه قالى الاتنين لعبة

(قطع)

الميت مالوش غير التراب اللى عليه
كل طقوس الجنازات لارضاء الاحياء
اللى مش بيتخيلوا انهم ممكن يسيبوا الدنيا بالهدوء ده ....
ديستوفيسكي كان بيقعد جنب قبر ابنه يرمي عليه لقم العيش
عشان تنزل العصافير تونس نيتشه الصغير
و في الحقيقة هى بتونسه هو.
(قطع نهائي)

09‏/12‏/2008

simulation

نقيض اللحظة
اعدت التيار فجأة عند دخولي الشقة..............
ساد الضوء. و احسست أنني ارى لاول مرة في هذا النور.
توقف العالم حولي كأنما شاخ بدون مقدمات في هذه اللحظة. خلال النور بدا كهلا عصبيا ضاق بشيخوخته.
حتى هواء الشقة الراكد استحال لاذعا يحرق انفي وهى تتنفس يخنق صدرى بدلا من أن يملئه.
شعرت على نحو مفاجىء أننى لم اقابل الحياة يوما. لم توافيني أبدا .
و غشانى يقين أنها تتجنبنى على نحو ما على الرغم من تمسكي الشديد بها .
شعرت بحاجة هائلة للبكاء المحرق وودت لو اجلس متجمدا ما استطيع .
دون أن يلاحظني أحد .لكننى اكتشفت المدى اللا نهائي من الأخطاء التى عراها الضوء .
راحت عينى تتعثر فى الرماد الذى اثارته الاشعة الناقبة.
تراكمت النظرات الموجوعة بداخلها ثم انبثقت في فضاء الروح تنهشها بقسوة .
أخذت نظراتي تضحك بسخرية وتتمادى . كأن لم يعد أمامها سوى الضحك .
يزداد احساسي بالخواء كلما ارتفع صوتها فلم يعد امامها روح لتحرقها.
انتبهت لما حولى راجيا رؤية الجدران وما بداخلها .
بدت كهياكل مشوشة بالرماد
لكن لحظة رجائي تحولت إلى سخط عندما ارهفت السمع_ واقفا فى اضاءة شقتي الصاخبة_ وسمعت قهقهات ساخرة
بين ذرات الرماد المثارة في كل مكان كمن ينفض ركام سنين.
رحت اميز مصدر الضحك المستفز بين محتويات الشقة كل قطعة بضحكة وكل خطأ بسخرية .
رجعت للباب افتش عن زر الاضاءة اطفأته .كان صدري يختنق كلما اوجست لمس الزر ثانية

06‏/12‏/2008

Mutation

اهداء
إلى من قرأ _راعي بلا غنم _ ................وارهقته
اسباب الصغير للخوف من الليل تقليدية . فالليل يلتهم الشمس ويحيل ذهبها فحما ليس له ضى الذهب ولا دفئه.
في الليل يخرج له البرد لسانه ويرقص فرحا بين الثلوج المنهمرة .
يحبس الجميع بدورهم وينادي الذئب _صديقه_ ليتناول عشائه من نعاج والد الصغير.
في الليل تفقد اصابع والده صلاحيتها للعزف ويصمت الناي.
بعد الليل ..................لم يجد أمه _اخبروه_أ، الزائر الضخم دفنها في الوحل وسارت لباطن الأرض .
بعد الليل(مرة أخرى)......لم يجد ابيه_اخبروه_(نفس الرواة الذين يخبرون الجميع بالحواديت)
أن الملاك الرقيق رفعه للسماء وسار لكبدها قرب الشمس.
عندما كبر على صفة الصغير ؛ ادرك أن من تفر مع عشيقها تظل على سطح على الأرض والذي يموت هو من يسير لبطنها .
لم يطق أن تطأ قدماه تراب يخفي جثمان أبيه .فارتفع على اقرب تل قابله ؛ومعه ارثه : الناى ودفء الشمس والنعاج ووعود الأب .
لم يتعلم الراعي أى جديد .كل ما أراده لحياته أن تكون نهار طويل كالذي قضاه في صغره مع أبيه.
يستمع الابن لعزف ابيه تحت دفء الشمس وحولهم النعاج تصدق على الوعود .كأن تكون للابن محبوبة ويخاف الذئب نعاجهم.
بحبكة امريكية بحتة تنتقل روح الأب للناى ليلقن ابنه الدرس :
يجب أن يتعلم من اخطاء من سبقوه ........يبذل مجهود ليجد من يحبه بصدق................ومجهود اخر ليبقيهم بالجوار.
استعانت روح الاب باصابع الابن الرشيقة الذى لم يكن يوما عازفا وان كانت اصابعه هى من تحمل الناي .
عندما ملك الاختيار رفض ان يعيد معزوفة حبيبته المفضلة التي جاءه بها الناي لانها متعبة .
وعندما هزم الناس برد الليل بنيرانهم ليسمعوه اغمد النيران تحت شعار نور الشمس وحده يكفي وانتصر البرد ودعى صديقه الذئب .
فرغت حيل الناي لتقلين الراعي الدرس وصار الابن بعمر الاب .
ادرك الاب ان الارواح لا تلقن الدروس الا فى هوليوود .وان عليه ان يشهد موت ابنه ثم يموت مرة أخرى
فضّمن أخر ألحانه خلاصة تجاربه وعزفها بواقعية سمعها الجميع جنائزية مفزعة
فتفرقت النعاج
وانتهت صلاحية الاشياء للحياة وسكنت
حتى الثلوج تعلقت بالهواء ولم تكمل سقوطها لترقص مع البرد الذى صار عجوزا هو الاخر
واقترب التل من الارض ليرقد الراعى الوحيد الى جوار ابيه في هدوء

29‏/11‏/2008

راع بلا غنم

لا يذكر راعي الغنم العجوز متى رحلت اخر نعاجه ليتوقف بعدها الكون فوق تله الذي كان يوما كبير.اعتاد حدة الثلوج المعلقة بالهواء والتي لاتسقط ابدا؛و زرقة يديه التي لم تجدي معها اشعال الخشب المحمل بهزائمه اللزجة. لم يعتب على الناي عندما بدأ بتفريقهم .كان مدينا له بالكثير. هو أخر وعود ابيه قبل أن يصعد للسماء كما اخبروه.تأكد حينها أن الناي سيوفي بالوعود الأخرى بشكل او بآخر. كان الناى كريما معه لأقصى حد. لم يرهقه بحفظ آناته أو ابتكار المزيد.اراد فقط أصابعه الرشيقة لأنه لن يعزف نفسه.

عندما أدرك الراعي أن لا أحد يصعد للسماء وأن جسد ابيه بالجوار ..رحل. لم يطق أن تطأ قدماه تراب يخفي جثمانه. حط على أول ارتفاع قابله. لم يسأل لما هو الوحيد الذي لا يسمع نايه. كل ما شغله: أن في كل مرة ينهي عزفه يتحقق وعد ويكثر الغنم . وعده ابيه أن يجد من لاتنسى وروده ؛ جاءه بها الناي بعد المعزوفة الأطول والأكثر ارهاقا لأصابعه . عندما رفض أن يعزفها لها ثانية هجرته ولم تنس يوما وروده.وعده أن تخاف الذئاب غنمه ؛ فأبقاه الناي عازفا طوال الليل يتجمع الناس لأجله بنيرانهم التي اصر على خمدها لأنه لا يرضى بنور الشمس بديل .عافاه الناس ليلا و زاره الذئب وهو خائف من أنين الناي المرافق للنعاج.

فهم الراعي متأخرا لما أجّل الناي الوعد الأهم : أن يظل نبض ابيه وفق نبضه. سيفتقد الناي أصابعه ويصمت. كانت معزوفاته الأخيرة مفزعة ولا تحقق الوعود فقط تفرق الغنم وتقرب التل من الأرض. لم يلحظ العجوز أن حاله لم تكن أفضل من الناي المحتضر إلا مع رحيل أخر النعاج وبقاء آنات الناي وفق نبضه؛ يستعجل استبدالها بنبض ابيه.


26‏/11‏/2008

اقتحمته نظراتها بوقاحة. بدت كمن ينتظر أحد. أصدافها معدة داخل دوامات رملية حول عين مرسومة تشبه عينها المكحلة.لملمت ثوبها الواسع لتكشف عن الخلخال الفضة فوق كعبها. استفزته ب (كنت اعرف انك ستأتي ) التي بادرته بها. فكر : كيف يمكن لأحد أن يعرف مسبقا بحق السماء؟. شك أنه ربما سأل بصوت عال عندما ردت بهدوء ...الصدف يخبرني ....لم يهتم بالأمر. يؤمن بالتخاطر اللحظي خاصة لمن له جمال عينها. يستوعب معرفتها بالآن حتى ولو لم تدركها حواسها علانية فالوجود هو الفيصل في عرفه .

منذ نصبت خيمتها لم تنادي أحد. تداعب اصدافها ...تجول بها البحار وتخبر من يمر أمامها عن ماضيه .....فهذا توفيت زوجته وهذا قتلها. بعدها لم تخل منهم خيمتها . ليس للامس فهم يعرفوه؛ لكن للغد ....افترضوا أنها تعرفه.
قلبت صدفة وسألته عن الفتحة الواسعة بسقف بيته ......لما لم تغلقها؟.........شعر بارتياح لأن شيئا غاب عنها ؛حمّل نبرته الحكمة واخبرها :عندما تمطر لا استطيع العمل والماء ينهمر فوقي ........عقدت حاجبيها وقالت وعندما لا تمطر .......رد بتلقائية: حينها لا يوجد ماء لامنعه.

لم تفاجأها اجابته لا يختلف عن قومه كثيرا فقط يحاول أن يبدو أذكى ؛لكنه ضل الطريق .سايرته بخبرتها فهى تكره أن تخسر زبائنها . لستَ هنا لتسأل عن مستقبلك .....دعني أتأكد .........تزيد الدوامات حول الصدف وتصيح بحماس مفتعل .......انت هنا لتعرف ذاتك. انصت لها وهو يهز رأسه موافقة .
لمحت كيس النقود المنتفخ المتدلي من جيبه قدرت دون مساعدة الودع أن به الكثير. جمعت الأصداف في يديها ودارت حوله كأنها تباركه ....الصدف احبك ويريدني أن اخبرك الكثير. ساسمع طالما سيخبرني بالموجود الذي لا اراه ........سيخبرك بغدك.....يعبس بوجهها: كيف سيخبرني بما ليس هنا؟......تهمس في أذنه ...وما ادراك؟.

تجلس علي ركبتيها امامه. تمد من العين شعاع طويل يمر به إلى مالانهاية .ذاتك ياسيدي جزيرة وسط البحر كتلك العين....وكيف اصل اليها؟ .....انت هنا لتأتي هى إليك .مازلت اجهل كيف .......تجنب البحث عنها وتعاطى ايامك بافضل صورها وستأتي راضخة اسرع مما تتصور .لم يفهمها لكنه دفع الكثير ....عرف أنه سيعود ....فقد اعجبته العين.

20‏/11‏/2008

life remix

اكتر فكرة مسيطرة عليا الأيام دى انى ابدل روحى مع حد ليه ماجربش اعيش حد غيري بتفاصيل مختلفة؟
نفسى اجرب اعيش مثلا دكتور جامعة ب
IQ
عالى وتتابع افكار سريع ويوم منظم وهدف واحد محدد فى دماغه.
بنت فى جامعة امريكية اصحابها كتير ومشكلتها الاساسية حقوق الحيوانات الضالة فى شوارع مصر .
صحفى مشغول يجرى ورا الخبر يكتبه حلو يتنشر له مقالة هنا وهنا .
كاتب يألف رواية بايقاع سريع واسلوب جديد موجز من غير مط ولا كلاسيكية
تفاصيله نفسية او شكلية ذات ابعاد نفسية
زى سيجارة فى بوق مثقف باسنان صفرا او مراهق شعره لزج بكيلو جيل على راسه
وام بى ثرى مولود بيه كعيب خلقى فى ودانه
او الخمس ست طرح متعددى الالوان اللى بتلفهم بنت فى المجمع النظرى ولسه برضه الشعر الغجرى المجنون باين
والاكلادور الاسود اللى بيفكرنى بالساحرة الشريرة .
او اكون طالب طب مجتهد يحضر الروند الصبح يذاكر الضهر ويدون بالليل .
بنت جميلة اوى مابتكلمش اى حد فيقولوا عليها مغرورة ويتعرف عليها الجان زى فى الحواديت
ويعرف قد ايه هى طيبة ورقيقة وبتساعد المحتاجين .
بنت وحشة اوى بس شخصية اخت الكل البنات تحبها عشان اوحش منهم والولاد تحبها كأنها واحد صاحبهم.
حابعد عن الامهات عشان مشاعرهم حقيقية زيادة عن اللزوم ومش حاعرف ابدلها.
عاوزة اجرب اكون ولد صغير بيعرف كمبيوتر حلو اوى يقعد على اللعبة يخلصها فى ساعتها بيحب الكرتون ومسلسلات الست كوم فى ديزنى تشانل .
او بنت صغيرة بتشترى بسكوت وبالونة حمرا وهى راجعة من المدرسة تكتب واجبها وتلعب بالبالونة
تبوس مامتها بحماس وتاخد اكبر حضن وتحلم بسحاب غزل بنات بمبى
وملايكة بيضا تأكلها رز بلبن ومهلبية زيادة عشان حماس البوسة .
اجرب اكون دكتور امتياز نحلة فى الاستهبال اقصد الاستقبال يشوف ده ويضحك مع ده
يقيس ضغط ياخد غرزتين يعمل رسم قلب ويقراه يثبت حالة ازمة قلبية
يتعامل صح ....يقرب من ولد صغير مدمن يطلع اهله بره ويسأله انت بتشم ايه؟
يخليه يثق فيه فيكر له تاريخ حياته كله .
عاوزة اكون ولد فى ثانوى يوم الخميس يرمى مذكرات الدرس جنب اقرب حيطة ويلعب ماتشين جامدين
وكام دور كونكر ويختم الليلة بسندوتشات كبده من اقرب عربية على اول شارعهم
فى الغالب حيشرف عند دكتور الاستقبال تانى يوم .
عاوزة اكون فى شلة اصحاب بتصيف فى خالد بن الوليد تنزل من الصبح على البحر
تلعب راكت على الرملة اللى جرى عليها صعب
تقضى الليل ورا القلعة تاكل حمص الشام وتشرب شاى تسمع ام كلثوم على عمرودياب
اوهانى شاكر وميادة الحناوى كعقاب لو مادفعوش بقشيش كويس
او يدخلوا الحفلة المجانى اللى فى القلعة بيجيبوا ناس غريبة بس اهى هيصة وخلاص .
اكون طالبة فنون جميلة اشيل اللوح الاسمر الضخم اروح متحف التشريح فى كلية طب
اقعد على الارض ارسم العضم بتركيز اكتر من طالب طب اللى جنبها
بيحاول يحفظها ويبص كل شويه على رسمها
او اروح المتحف المصرى اقعد على الارض برضه
_باحب اللى بيرسم على الارض _ارسم القطة السوداء بعيونها الواسعة
تحسسك انها مرقباك من ساعة مادخلت
اكون مرشدة متأنتكة لابسة شيك وباتكلم شيك فرنساوى وتكون اللوحة اكتملت
اكون اسراء صاحبتى مانيكان ببابي فيس اشترى هولز الحمرا والمصرى اليوم الروند كله يقراها قبلها
بتحسب يومها بالدقيقة وبتابع مسلسل نور ومهند بحماس بالرغم من انها بتكره مهند
اكون مدرسة فى حضانة اقول
APPLE ......A
ويردوا ورايا اجاوب على اسئلتهم البسيطة بثقة
عشان عارفة انهم حيصدقونى الحقهم قبل مايكبروا ومخهم يتخن ومايصدقوش اى حاجة
اعلمهم الاكسليفون واغنى معاهم ماما زمانها جاية ........والديك الشركسى صاحب جارتنا راندا...
...وفى حصة الدين اعلمهم سورة الفاتحة ومحمد نبينا
اكون مربية اطفال فى بيت امريكى فى القرن 18 اعلمهم البيانو والتاريخ والاتيكيت
اشربهم الشيكولاتة السخنة الساعة 5 واقرا لهم ادب شكسبير جنب الدفاية
واخدهم لما التلج يجمد للتزحلق وياكلوا ابو فروة
واروح حفلة راس السنة لابسة فستان منفوش وحاطة بروش فرعونى على شكل عين الحياة من الجعران الاخضر
ارقص كلاسيك يترفع لى القبعة وياخدوا منى الشال الفرو اقلع الجوانتى الابيض الطويل بذوق وانحنى
اكون بنت فى فيلم عربى قديم بتبص من ورا المشرابية
على جنب راسها ضفيرة سميكة وقوية تاكل مفتقة عشان تبقى مليانة ومبرومة
تبص من ورا باب اوضتها على الدلالة وهى بتجيب هدوم الجهاز
وتاخد صورتها تضمها لالبوم العرايس ومن الآخر مش عاوزة اطول فى روح البنت دى كتير عشان حتعارك معاها

11‏/11‏/2008

كتاب عجبنى

إزازة

( شخص يقف أمام آخر ويعرض عليه زجاجة كوكاكولا )
الأول : اتفضل إزازة كوكاكولا ؟
الثاني : آسف ، مقاطع .
الأول : بس إزازة متفرقش قوي .
الثاني : أصلهم بيقولوا كل ما تشتري إزازة بتساهم في قتل مسلم
فلسطيني .
الأول : بس انت مش دافع حق الإزازة ؟
الثاني : إذا كان كده ، هات .
إظلام سريع
*****************************************
أنا مش حزين عشان قمت متأخر لكن حزين لأني قمت من غير ما احلم .
وصحيت علي جملة كهربتني طول اليوم وهي :
أول مرة حسيت بالقهر والظلم لما قطعوا حبل الرحم عشان أعيش لوحدي،
**************************************************
القرار الأخير

( يجلس أربعة أشخاص موزعين علي خشبة المسرح بشكل مربع
وتسلط عليهم بؤر إضاءة عمودية وقبل أن يتكلموا نسمع موسيقي صاخبة للحظات
تم تقطع فجأة فيملئ المكان الصمت ويزداد الصمت لحالة الملل
الي أن يبدأوا الحديث بشكل بطيء جدا )
الأول : أنا هاتصل بـ ( 09999999) وهاكسب فلوس كتيرة .
الثاني : أنا لما اكبر هاصلي والتزم .
الثالث : هاحب بلدي لمل تديني شغل .
الرابع : هاستنى صاحبي لما يرجع من السفر عشان احكيله يمكن استريح .
( ثم يدخل المؤلف مسرعا ويلف حولهم لفة واحدة ويقف )
المؤلف : انتو مسنين مين؟ ماهو مش جاي ،
والله العظيم ماهو جاي ، وخليكوا قاعدين ( ويرددها ) .
يسدل الستار
****************************************************************
الفقرات للجميل المتواضع باسم شرف فى مجموعته المسرحية جزمة واحدة مليئة بالاحداث .
الكتاب غير تقليدى زى ما هو واضح من العنوان .
ببساطة بيصور مواقف ممكن تكون مريت بيها ويقولك انها ممكن تتشاف برؤية مختلفة وبزووم إن تبان التفاصيل اوضح
عشان تسأل نفسك انا ازاى ماشفتهاش كده من الاول ؟
النصوص فيها مرونة ومساحة حرية انك تفهمها حسب تجربتك وخبراتك
ضيف على كده الدهشة والمتعة المرافقين ليك من اول العنوان والمخاطبة المباشرة ليك بارجوك ما تتحركش للقرار الاخير
باسم شكرا على الكتاب وعلى الوقت الممتع اللى قضيته فى قرايته

01‏/11‏/2008

ندى

تتعلق بكم والدتها بشدة والاستاذ المساعد يوجه الكشاف المستفز لعينيها.
لم تتبرم كغيرها .................يحمر وجهها وتنظر للارض عندما يترك الطبيب رأسها.
ضوء الكشاف في العادى يخنق المريض........ تدمع عينيه كثيرا .......تضايقه حرارته
والصداع الخفيف الذي ينتابه بعد مرور 50 كشاف ل50 طالب على عينيه باصرار.
عينها اليمين لم تدمع ولم يضايقها الضوء اخبرنا الطبيب بانجليزية مقلقة لامها انها
(no p.l.)
لا تدرك عينها الضوء فلا تحسه .كنت اتابعها باهتمام والاستاذ يشرح حالتها بسرعة .
وجهها جميل رغم ما بعينيها .
امها اخبرتنا انها ولدت بعيون سوداء واسعة.
لم تتوقع ان عدم احتمال عينيها نور الشمس كلما خرجت بها وهى ابنة السبع شهور
سينتهى بضياع كامل لملامح عينها اليمنى وفشل متكرر للعلميات باليسرى والتى مازالت ترى بها
تنحنى من حين لاخر على حذائها البالينيرة ذى الوردة البنفسجية لتعدل ربط الشريط على قدمها .
حضور الشرح مرهق جدا للمريض واهله
ناهيك عن انه يجلس ساعتين يجرب فيه الاختبارات اللازمة
فهو يسمع كلام لا يفهمه ويتوقع ان يكون كله عنه
اقل سؤال يسأله وهو خارج هو انا حالتى خطيرة اوى كده؟!
امها هادئة منصتة تتلقف كل كلمة تقال بالعربى .
تعبت الصغيرة من الجلوس اسندت رأسها على كتف الام وضغطت بكفيها على اذنها
رن موبايل الاستاذ بصفارة اشبه بسارينة الاسعاف
فخرج ليرد على المكالمة واندفع طالب بسرعة نحو ندى ليراجع الشرح
تطفلهم فى الغالب يثير حنقى خاصة عندما يكون المريض مطاوع كالفتاة وامها .
عاد الاستاذ لشرحه السريع .كنت اجلس فى الكراسى الامامية
سألنى عن احدى العمليات التى شرحها لتوه
طبعا لم اسمع مما قال كلمة لم يتوقف عندى طويلا وانتقل لمن بعدى
وازداد حنقى لاننى لم اركز فى فهم علاجها.
no p.l.= no perception of light =Inability to see any light. Total blindness

27‏/10‏/2008

kitsch

الكيتش عرفته من الويكيبديا وغيرها

المبهر فى الكيتش ان مالوش قالب يعنى عيش عرفه زى ما تحب الشائع انه بديل مثقف لكلمة بيئة
حيث انها اصبحت فى حد ذاتها بيئة والكل بيقولها .
الكيتش يعنى لا نعدكم بالافضل فى الغالب لانعدكم بشىء على الاطلاق .
كيتش يعنى جملة جات غلط فى وسط الكلام زلة لسان.
يعنى حدوتة فبركها صحفى عشان لازم يكتب حاجة لانه بياخد فلوس .
يعنى قصيدة اتلزقت عشان مضطرين نملى صفحة ثقافية فى مجلة.
يعنى الحبيبة تطلع ام البطل فى اخر الفيلم زى افلام حسن الامام .
يعنى جوابات مراهقين متعطرة ومليانة كلام غزل على شاكلة
(انتِ اجمل بنت فى الدنيا) و(أرى الشمس في نور عينيك)
( يا ملاك نازل من السما)( يا شمعة تنور (مش تنير) ليلي المظلم) .
يعنى( انتى ليلى وانا قيس) والجرى للى عاوز يلحق الاتوبيس.
يعنى مشاعر زيادة عن اللزوم واللى يزيد عن حده ينقلب ضده والسكر الكتير بيموع النفس.
الكيتش يعنى الرومانسية الساذجة تهمة... ماركة مسجلة على جبين صاحبها.

الكيتش يعنى كتاب رمد 400 صفحة يخلص بتركيز فى اسبوع .

يعنى

round
اربع ساعات يتشرح فيهم ساعة ونص والباقى مستنيين الدكتور يجي.

يعنى الآدميين عينات احياء او اموات .

يعنى طب مش باحبه ومش عاوزة اشتغله
يعنى اخلص شيكاغو كلها فى 3 ساعات
واقرا ورقة واحدة فى الكاتاركت
(cataract )
فى 3ساعات برضه .
يعنى فى سنة اولى وتانبة ايام الامتحانات اقضيها عياط وحرق اعصاب
وتالتة فى الفارما اسهر جنب الموبايل شغال على اذاعة القرآن الكريم احفظ واسمع من غير دمعة
يعنى فى امتحانات الباثولوجى احفظ على صوت الضحك والنكت للعرسان الجداد
فى الشقة اللى تحتنا وهما جايين يقضوا شهر العسل فى اسكندرية.
يعنى تعدى السنة بجيد جدا وانا مقضية نصها على الماسنجر باتكلم
واتعلم الدرس فى النهاية
easy come easy go

والكلام عن ضعفك مايبقاش مع اى حد والافضل بلاش الكلام عنه خالص .

الكيتش يعنى تمسك قلم عشان تكتب قصة واقعية فتطلع خرافة وفيلم عربى قديم

الكيتش انك تقول عاوز ابطل كتابة فيكتب قلمك لوحده حاجات ما تتخيلش انها تطلع منك


http://en.wikipedia.org/wiki/Kitsch


http://www.merriam-webster.com/dictionary/kitsch


23‏/10‏/2008

اريد قصيدة


اعطر الأوراق............اهذب القلم الرصاص....اضع إلى جوارهم الزهور البيضاء الكبيرة التي تذبل دائما مع كتابتك للصفحة الاولى. اجلس ارضا إلى جوار مكتبك ............اضيف البندق المسحوق للبن.احب رائحة القهوة ولا أشربها.عبث ما اقول .........بلامعنى .....و لا يهم.

الدوران حول نقطة ثابتة في دائرة مغلقة يشعرك بالملل والغثيان .اللامبالاة اعظم علاج نفسي .اذا غلا علي شىء استغنيت عنه .......الاستغناء هو اول الأشياء التي غلت علي .........عبث.......اللامبالاة هى الحل . تأتيك معظم القصائد بعيدا عن اوراقي ............عطرتها.......ماذا كنت اظنك ؟.............عضو في جمعية القفازات البيضاء ,تأتيني فى الخامسة للثرثرة و شرب الشاي والبسكويت .لن أرتاح حتى تكتب قصيدة أمامي. لا يهم أن تكون عيني ملهمتك.........سأجلب لك الغجريات .........ما رأيك في عيون ساندرا بولوك ..........مثالية وألهمت غيرك لم يشكل لهم الزمن حاجز. القصائد تتدلى من السماء ..........التقط واحدة لم يكن يوما الغلاف الجوي عائق..........لماذا يحب المؤلفون شخصية الراقصة ذات التوجهات الساسية؟ لا الهام سماوي فى هذا. احببت طفلك المفكر.....عندما تتوه عد للأصل ...لم يجد حليب بالشيكولاتة فاطعم البقرة الشيكولاتة وانتظر.

مازلت تحتاج قهوتي بالبندق .........قلمي الرصاص .........اوراقي لم اعطرها ولم احضر الزهور .لن انتظر قصيدتك ...اريد واحدة وساكتبها بنفسي .............جلست على مكتبك وبدأت وعرفت لما لا تأتي القصائد عندما نريدها

20‏/10‏/2008

شروق مبهج


لقاء سلس ناعم........ارتطام خفيف للتنشيط.
هكذا دوما موج الفجر جديد وطازج. مركبي طفل صغير يحب اللهو مع الموج.
استمتع بلمعان توتره السطحي من حولي
نور الصباح مغطى بلفافة شفافة,و أنا أريده واضح.
سر اللعب يكمن في ألا تنظر للشط من خلفك ........أمامك الأفق اللامتناهي.
مهما كان حجم مركبك تذكر.................................انت فى البحر الواسع.
ليوافق الموج على اللعب ..........توحد معه.........توقع حركته القادمة وابدأ بها.
سيعجبه حماسك ويزيد الغلالة الفضية من حولك.
سيمنحك شعاع شمس لك وحدك دائما يسبقك بامتار ...........اعتبرها للتحميس
علي الأقل ستجد ما تجرى خلفه.

10‏/10‏/2008

عن الآن وما كان



ظل يبحث في حواري كرموز المتشابهة المرصوفة بالكوبلت من أيام الأنجليز عن نصبة المراجيح المضيئة .في العيد _كما يتذكر_ كانت تنير حارة خالته بأكملها فذلك موسمها تعد له من السنة للسنة .
لم يجد لا النصبة ولا الساحة الواسعة أمام الحارة والتي طالما لعب بها الكرة.كانت تطل على الترام مباشرة اصبحت كلها عمارات متقاربة يسلم سكانها على بعضهم باليد من شرفاتها .
دله على البيت رقمه الذي ظل يتذكره طوال الطريق والمسجد القديم الي جواره..
لم يأت الي هنا منذ زمن ......البيت كما هو , ثلاث طوابق ؛أولهم يبعد عن الأرض مترين سدوا شرفاته بقضبان حديد ؛لم يعد آمن كما كان يوم بنائه .
تسكن خالته الطابق الثاني ؛تفاجأت عندما رأته قبلت جبينه ونادته بابني كما اعتادت منذ صغره .تنسم رائحة خَبز كعكة تدفء الشقة .جلس في ركن صغير به صالونها ذو الطراز القديم .
مازال متين واكتسب جماله من عمره ؛على الرغم من ضيق الركن إلا أن كل قطعة في مكانها تماما .
غابت فى المطبخ قليلا .امتزج صوت اعدادها لصينية القهوة بدعاء الشيخ حسان القادم من قناة الرحمة "ولى شهر رمضان ببركاته ورحماته فاللهم بلغنا رمضانات عديدة" خيرته أن تحضر له مياه غازية مع الكعك لكنه فضل قهوتها .....يعلم أنها تعشق إعدادها على السبرتاية الصغيرة .
شعر براحة وألفة في وجودها دائما يعتاد بيتها بسهولة لم يشعر ابدا أنه ضيف به؛ على الرغم أنه وسع دفء الدنيا كله لم يكن هو ذاته بالواسع "ده كله اوضه كبيرة قسمتها صح" كانت تحكي بفخر "زمان أما كان يجي ضيوف أو عريس لبنت من البنات الستارة البيضا التقيلة تتمد من مكان نومهم للمطبخ والحمام ...كان فيه غيرها بيذاكر يحتاج يشرب أو يدخل الحمام ".
ظل يلتهم تفاصيل البيت بعينيه .......المصحف الكبير المفتوح على سورة يس......... اخبرته أنها كانت ترفض تماما دخول الوصلة بيتها " لما كنت عند ابنى الكبير فى مصر البنات دخلّوها من ورايا "كانوا يعلمون أنها ستحب قناة الرحمة والمجد ومازالت تعرف الأخبار من نشرة التاسعة ؛لم تجذبها الجزيرة ......لا تحتاجها لتعلم أن الأمور قد ساءت.
أعطته قهوته بمودة ؛كان حوارهم يبرد كلما تحدثوا عن الآن ويزداد دفء وحرارة كلما تذكروا ما كان ؛ترحموا كثيرا على والديه .استرعاه غياب صورة جده .علم أن ابنها بروزها ووضعها في حجرتها ببيته فى مصر"كان عنده أمل افضل عشانها هناك"لم يعرف أنها تحتفظ بآخرى صغيرة لم تريها لأحد من قبل "اخدناها له في مرضه الأخير......... أخر مرة كان يلبس عمامته ويكتب في دفتره ........كان أشهر مأذون في بر رشيد .........البلد يومها وقفت على رجل لازم الشيخ يحضر ويكتب بايده كتابهم .....سندناه لهناك عشان يبقى فى وسط أهله كأنه بيشهدهم على اخلاصه لأخر نفس" احتضن الصورة بيديه ......علامات المرض بادية عليه لكن وقاره ونوره ظلا فى جبهته لطالما اعتقد أنه اشبه خلق الله بالشيخ الشعراوى .
لم ينس الصيف الوحيد الذي قضاه بداره . يومه يبدأ كما أراد الله لعباده؛صلاة الفجر يأٌم فيها البلد .....يجلس ليقرأ على البحر لطلوع الشمس ........شربة العدس إفطاره الذي لا يستبدله ..........مكتبته الكبيرة التي مازال نادما أنه لم يقرأ بها الكثير ويحاول إلي الآن تجميع مثلها .حضر له خطب كثيره وشهده وهو يعقد قرانات عدة وشعر بالزهو من استقبال الناس له فهو حفيد الامام.يوم جاءه خطاب تعيينه ناظر لأحد المعاهد الأزهرية -فمعه شهادة العالمية - رفض أن يترك بلده. بعد عنها كثيرا مابين دمنهور والعامرية وكوم حمادة وبالنهاية أراد أن يبقى ببلده ليدفن بها فترابها سيكون رحيما عليه .
سألته خالته عن اولاده أخبرها أن كبيره في نهائي هندسة ....دعت له أن يوفقه الله ليتم تعليمهم جميعا "اتنقل جدك فى مرة للعامرية وهناك كان فيه دكتور واحد ومدرس واحد وهو برضه الامام الوحيد .........كنت لسه مخلصة اعدادى...........كان عاوز يدخلنى ثانوى معلمات في أسكندرية البلد" دائما ماكان يستشير والده فى كل خطوة يقوم بها فأرسل له خطاب "لما وصل الرد نادانى ياغالية _دايما كان بيقول لى يا غالية_ اقرءى كلام جدك الجملة اللى فاكراها-كيف تقف على منبرك تخطب الناس وابنتك هناك بعيدا عن عينيك " صدق الامام على كلام ابيه وما أكد رفضه قصته التي حكى فيها عن المعلم والمعلمة وهما يتناجيان في المدرسة حسبما ذكرت روايته .ضحك من التناجي الذي اوقف تعليم خالته وفكر أن مايحدث فى المدارس والجامعات الآن يوقف تعليم البنين أيضا فى عٌرف جده. أوقفها ضحكه لـتأكد له أنها لم تنس القرأة والكتابة فوالدها خاف عليها نسيانهم ودخل معها مسابقة من يحفظ القرآن أفضل ووعدها في كل مرة لا تخطىء في التسميع تأخذ ريال ولك أن تتصور قيمته وقتها .كان يتعمد أن يخطىء لتفوز بحفظ القرأن فى شهرين وبالريال .كانت تجلس أمامه يملي عليها خطبه ورسائله .......يقدّر باهتمام مقترحاتها للخطب القادمة ......خصها بمجلاته العلمية التي يستحضرها من القاهرة .تبرعت بها بعد وفاته للمسجد ليترحم عليه من يقرأها.بعد أن دخل أبناؤها المدارس كانت تكتب لهم موضوعات الأنشاء .كانت تتحدث بحب وبمرح عن اقرب حفيد لقلبها "هو كمان قد ابنك في نهائي هندسة بس فى جامعة القاهرة"لم يقضي هذا الصيف معها كما اعتاد .استطاع أن يحصل على تأشيرة سفر للندن "عرف يجيبها ويجيب شغل هناك فى الصيف ده ورانا على النت المكان اللى حيقعد فيه "لم تصدق أنه سيعمل بحق لكنه عاد بلاب توب ومصاريف السنة القادمة واعجاب عميق بالمعمار الإسلامي للمساجد والمراكز الإسلامية هناك. لم يتعجب من خالته عندما قالت لاب توب لم يكن ليتعجب لو علم أنها تستخدمه ايضا.
نظر في ساعته كان يعلم أن الوقت تأخر ولديه عمل فى السابعة صباح الغد.أستأذنها وشد على يدها ووعد بتكرار الزيارة .سجل رقم بيتها على موبايله وعلّم حارتها بالسيبر والسنترال على ناصيتها وتمنى أن يكرر الزيارة قبل أن يختفوا كما حدث مع نصبة المراجيح

29‏/09‏/2008

بيانات هامشية



بيان رقم 3
أيها المواطنون
انه فى ذات صباح أدرك طفل أن
1+1
لا يساوى شيئا على الاطلاق
بينما

2=1+1
وربما كانا3
أو 100 أو حتى 1000
السيدات والسادة
ان 22 لا يمكن أن تساوى
"واحد"
بينما 50 تساوى الولايات المتحدة الامريكية
وربما أضيفت اليها مصر وليبيا والعراق
وبقية ال22
وانا
وانت
ونحن جميعا
انتهى

بيان رقم 5
النهار
محنة الوحيد
فلا تقذف بالماء فى وجه امرأة تحبك
واقرأ
"الوردة
طائشة
وبغى."
انتهى


هذه بيانات لاتهتم كثيرا بالنظام العالمى الجديد



يمرون
الاصدقاء
الذين نقابلهم مصادفة
مثلنا .......عابرون
ولا يعرفون اين تختبىء الحقيقة
هذه المرارة فى وجوههم
تناسب تماما
شابا فى الخامسة والعشرين
لم ينفرد مره بحبيته
لم يجلس الى طاولة يمارس عمله من خلالها
دائما امامه براح من الوقت الذى لا قيمة له
دائما يستمع الى صراخ امه
وسعال ابيه
والشيخوخة التى ظهرت فى الجدران
مبكرا


شعر عبد الوهاب داود
































12‏/09‏/2008

احدى متاهاتي


احتفظ ببقايا عقلك المهزوم ربما يمكنك تحمل الهزائم ولا اقولك لاداعى...... سيكون تحملك افضل بدونه كل ما اريده اجازة بها ماء وخضرة ولا داعى للوجه الحسن لان الحسن نسبى .اسكندرية الغلابة تثير خوفي وغلابة اسكندرية يثيرون حزني.طبقة متوسطة...... طبقة فقيرة...... سيان.ازمة المثقف انه يفكر بالحياة اكثر مما يعيشها .

حبك حلم ساء لدرجة جعلت منه كابوس. اهرب من اللعب خوفا من الخسارة ولكنى بذلك لن انجح ايضا.
عندما اكتب خطابك اخذ مخاطرة الاطالة والتعرض للخطأ فى مقابل عرض الفكرة .الحياد مريح يشبه النوم فى السرير قبل الامتحان بيوم.......... كالممثل الذى لم يحقق فيلمه الجديد ايرادات ففضل الجلوس فى مقاعد المشاهدين فى العام الجديد مدعيا انها اكثر حميمية. لو حسبنا وقت النوم والجرى وراء لقمة العيش واكل تلك اللقمة سنجد ما عشناه عمر قصير جدا
ولو حسبنا وقت التفكير سنجدنا موتى من زمن

لا يفترض بالابواب المغلقة ان تثير كل هذا الفضول حتى ان معظمها لا يكون سبب غلقه وجيها, فليس خلف كل باب بحيرة البجع كما فى قصتى المفضلة ,تنزل البجعة لتنزع عنها ريشها فتصير حورية تنعم بصفاء مياهها التى سحرها لاجلهم الساحر الطيب بعيدا عن الاعين لكنه كما يبدو لم يكن ماهرا بما فيه الكفاية فجميعنا نعلم عنهم الان وحكايتهم تحكى منذ زمن.

غالبا ما نغلق الابواب على الهزائم والحماقات والمسببات الدائمة للغثيان نغلق علينا وهى معنا للحفاظ على صورة ادمية نطالع بها من حولنا .

امى تعلم بكائى عندما اغلق باب حجرتى.اخبرتى مؤخرا انها لاتفهمنى

ابى صرح لى ان كلامى يلبسه نظارة سوداء فوق عينيه لم اصدق ان لى هذا التأثير .

كلمتنى صديقتى من يومين وبدأت كلامها بانها متفائلة جدا اليوم وترجتنى ان احافظ على جوها النفسى.
من يبالى اذن بجوى انا؟؟؟!!

18‏/08‏/2008

قصة مش راضية تتكتب



من البداية وهى تبدو عنيدة. القصة اللعينة لا تخضع لقوانيني. أردتهما تحت المطر ليقول لها احبك بصدق.بدا سؤالها منطقي وهى تسخر مني لماذا تحب الرومانسية المطر؟.اخبرونا انه رمز لبداية التطهير.تعطيني ظهرها......ا كيد سمعتيها في فيلم.
البطلة كالعادة جميلة مدللة تقع في غرامه ذلك المطحون الذي يبهرها بشخصيته القوية التي ترفض تدللها بعمق....... تقربها مصداقية فقره.....الغلب عامل جذب كلاسيكي.سيدتي لا يشترط في الأبطال أن يعرفوا أدوارهم.......الجميلة تعرف أنها البطلة و إلا ما فائدة جمالها .........حسنا فليكن لقاؤهم بأي مكان الأهم حواره كلمات رقيقة تلين مشاعرها بعدما ألان تدللها برفضه.لا تتعلمين أبدا فتافيت السكر ما عد تش تحلى البسبوسة .كلامه الرومانسي سيقال بطعم سكر الدايت.
حسنا سأذهب أنا واكتبي نفسك

09‏/08‏/2008

طق حنك


كثرة البكاء تترك الروح مهترءة صدئة وأنا ما أردت لروحي بأن تصير مثلي.
الراحة كعبتي أدور حولها ولا أدخلها .أشعر بخدرها يسري في أوصالي كلما قرأت,عندما أريد المزيد احضركتابه أمام عيني أقبله ولا أقرأه.
تعلمت من الصوفية أن أتجاهل من يؤذيني لا أستطيع تجاهلني.
تمنيت أن أراه قبل أن أنام فحلمت بنجمة داود .ما تفسيرك لحلم به مروحيات تختبىء منها في كهف يقودك إليه رجل أعمي؟.
قلبت فنجاني وعدلته لأقرأه فما وجدت سوى نقط سوداء.لا أحب اللون الأسود ولكنني أتلذذ بطعمه الذي يشبه الحصرم.
لن يأخذ من معرفتي سوى العبرة .العبرة لن تبقيه,عن تجربة ولا الحب يُبقيه........ الاحتياج وحده الرباط.

سأعلم أنه يحبني بحق عندما أراني في عينيه كلعبة الفيديو في عين أخي الصغير.
أتوق للاختباء والتلاشي ......حبات رمل صغيرة أضمها في قبضتي و أنفخ لتصبح جزء من كل شيء و أي شيء.
سأبتكر تعويذة.......... لمحات من أول لقاء......نصف قلب في سلسلتي كل نصيبي من الحكاية ..........أف قالها لي ولا يعنيها وأخرى يعنيها...........لزمته التي يكررها كل كلمتين.......امزجهم جميعا في بودر لامعة للمونتاج.أرشها على كل لقطاتي تشوشها فأتلاشى.

05‏/08‏/2008

تاج


وصلنى تاج من دكتور عمرو المتحدث الرسمى باسم الرومانسية وصاحب دعوة الحب للحب اللى كلامه عشان من القلب بيدخل القلب .

اسئلته يا سادة يا كرام كما يلى
أعطيتك ثلاث وردات .. من هم الثلاث أشخاص اللى هتعطيهم الورد اللى معاك..؟
الوردة الاولانية لامى وابويا احب وجهين عندى فى الدنيا اللى طول ما انا شايفة نفسى فى عيونهم الدنيا تبقى امان ومكان محتمل للعيشة لان فيها حد بيحبنى بجد
الوردة التانية لكل دكتور فى المستشفى او فى الصيدلية ضيع من وقته خمس دقايق وقال لى معلومة د/علاء ,د/وائل. ,د/سمر,د/منى,د/وليد اللى مصمم يجيب لى عريس مع انى قولتله انى حاستنى ابنه عمرو_عنده 3سنين_لحد ما يكون نفسه على الاقل اكون انا عملت الدكتوراة
الوردة التالتة حاحطها فى كتاب لحد ما يجى اوانها

لو أعطيتك ورقه فيها 3 سطور وقلتلك اكتب فيها اللى انت عاوزه هتكتب ايه..؟
1. لا اله الا الله سيدنا محمد رسول الله
2. اللهم ارزقنى رضاك والجنة واعوذ بك من غضبك وسخطك والنار
3. make every moment count

ما هو هدفك فى الحياة؟؟
يا سلام ببساطة كده ايه هدفى فى الحياة ؟!السؤال ده مشكلة جيل باكمله وانا طبعا مش حاجاوب عن الجيل كله بس هدفى ممكن يكون انى افهم صح عشان اعيش صح افهم الاسلام افهم طب افهم العلاقات الانسانية على تنوعها "مفيدة اوى فى كتابة التقارير واسألوا الدكاترة"

المقولة" إن شاء الله بكرة هيكون أحسن من النهاردة" هل تصدق هذه المقوله ولماذا؟؟
انا مصدقاها عشان فيه صديق عزيز عليا جدا مؤمن بيها وبالتفاؤل والدفعة الايجابية اللى بتديها وهى حتبقى صح اوى لما نعمل اللى علينا ونرضى

أجمل مقوله سمعتها فى حياتك..
قريت جمل كتير جميلة"ربما عابوا السمو الادبى بانه قليل ولكن الخير كذلك وبانه مخالف لكن الحق كذلك وبانه محير لكن الحسن كذلك وبانه كثير التكاليف لكن الحرية كذلك!" الرافعى
"المتاهة هى المكان المثالى لأرواحنا المبعثرة ..المكان المريح فى النهاية ..وأنا ماأريد سوى أصير عاشقا غير مكتمل ..كنصف بدر ونصف حقيقة ..وجهى المغطى بدمى ..هى أكثر أشكالى قربا إلى قلبى ..كنصف مهرج ونصف مقهور.."دكتور احمد الفخرانى تياترو صاحب السعادة

من المغنى اللى بتحبه أوى ؟
فيروز
و إيه أحلى أغنية بتحبها ؟؟
كتير حسب المود موعود عشان عيون عليا ......وكل القصائد اللى بالفصحى امس انتهينا ويا عاقد الحاجبين........ حبك مابعرف عشان القمر اللى صار اكبر والحمام اللى بينزل ياكل اللوز والسكر........ ولحن يا انا يا انا اعتقد انها مقتبسة من موسيقى لموتسارت............ واهو ده اللى صار اللى اتغنت عن مصر من زمن ولسة بتوصف حالها

غزه..تمثللك ايه فى حياتك..؟
زى اى مسلم شايفاها جرح بينزف ورمز مرعب على فشلنا فى فهم الاسلام وتطبيقه وتقريبا الفعل الايجابى الوحيد اللى بنعمله هو الدعاء

إعطى لانتمائك لوطنك درجه من مائه..
هو اصلا يعنى ايه وطن؟ويعنى ايه انتماء ؟اللى افهمه ان الوطن معناه حد ادنى من كرامة وامن واقصد بالحد الادنى الحد الادمى واللى الحمد لله على كل حال سايح على بعضه فى المواصلات والافران والمدارس والمستشفيات والسكاشن والانتماء ده شعور متبادل بين ادمى ومكان يجد فيه كرامته وفى حالتنا فيه طرف مفقود

لو تزوجت وانجبنت..بنتين وولدين..هتسميهم ايه..
لو حلوة.... حرف امتناع لامتناع .....بس ما علينا
البنات نور وليال
الاولاد مؤمن وعمرو

عمرك غشيت فى امتحان وانت صغير..؟
ولا انت كبير حضرتك انا اصلا مش باعرف وعاملة ازمة فى لجنتى كلهن اسماء بس كانهم واحدة بيظبطوا بعض وانا قاعدة لهم فى النص لا بادى ولا باخد طب اوصل طيب ابدا حتبقى فضيحة القاعة كلها حتسمع

لو أتعرض عليك رشوة كبيرة و انت فى زنقة مالية هتعمل إيه؟؟
اللهم عافنا ولا تبتلنا اللى على البر شاطر والكلام سهل وكل اللى اقدر اقوله ان ربنا يثبتنا فى المواقف الصعبة آمين يا رب

قول 3 صفات بـ 3 كلمات بس توصف بيهم شخصيتك؟؟
هادية
صبورة
مترددة
صفه عاوزاها فى شريك حياتك..
يفهمنى

إيه اللى غير دراستك وشايف نفسك فيه قوي
انا مش شايفة نفسى اوى فى حاجة انا بحب اللغات .......الانجليزى باحب طعمه على لسانى...... باحاول فى القصص........ نفسى اجرب اشتغل فى مكتبة بتبيع روايات وقصص مش مساطر وكتب خارجية ........ نفسى ابيع ورد برضه بس يكون كل الورد له ريحة وابيع تيولب كتير........ واجرب اشتغل فى حضانة عشان باحب الاطفال جدا


بتحب السفر ؟؟
اه باحب الطريق فى العربية اوى
لما ابقى مسافرة مطروح بأقرا واسمع اغانى الالوان فى مطروح واضحة جدا كأن حد متقل عليها سبحان الخالق البحر زرقته صافية الرمل ابيض اوى الصخور لونها مميز جدا وواضح حتى الليل لو ماكانتش ليالى قمرية بيبقى ضلمة اوى

طب دلوقتى حالا ايه المكان اللى نفسك تكون فيه ؟

على البحر اكيد ورا القلعة قبل الغروب بشوية

تمرر التاج ده لمين ؟؟
محمد حلمى مخلوف
لولا
ياسمين حواديت وحكاوى
احمد زكى الدين
اختى الجميلة عابرة
Immigrant
seven

26‏/07‏/2008

عندما اصير بدرا


عندما أصير بدرا
سأنير للجميع
لن احرم احد ضوئي
لن انتظركم لتكونوا عشاق لتروا كم أنا كبير
سأداعب بنوري كل هؤلاء النيام
وأنشدهم ما أطال النوم عمرا
-------------------
عندما أصير بدرا
سأفتح كل الطرق المغلقة
اعلم أن لا ينقصها سوى لمستي لتسيروا بها
-----------------------
عندما أصير بدرا
سأتمتع بتمامي مثلكم
سأتباهى بين أقمار الكواكب الأخرى
فانا من يٌكتب فيه الشعر على كوكبكم
------------------------------
عندما أصير بدرا
لن أنسى من احبنى هلالا
سأنزل له كل يوم ليهديني لمن يحب
واترك قبلتين على جبينهم لينيروا مثلي ويصبحوا توابعي
------------------------------------.
عندما أصير بدرا
سأنفخ من روحي في كل كلمة من قصيدة
ذكرتني ...أحبت نورى... انتظرتني
سأعوضكم جميعا ظلام الليالي السابقة
فقط لو أصير بدرا

16‏/07‏/2008

وجه 1



كل مرة يمسك الريشة تكون نيته أن يرسم وجه يضحك فقليل ما يرى وجوه تضحك, لكن ريشته كانت مرحة تفاجأ ه بطيور وفراشات واسماك ملونة .اليوم قرر انه من يتحكم وليأخذوا تعاونهم مأخذ الجد .أدارها في شكل بيضاوي ليفصل بياض الوجه عن بياض الورقة وليبدأ بضحك الشفاه فهو الأسهل احكم قبضته على الريشة وشكّل انفراجة. الشفة السفلى لم تطاوعه والتوت ,حاول مع العليا لكن الفم مازال ممتعضا .تنهد بعمق واتجه للعينين فضحكها الأصدق أراد عيون مفتوحة واسعة كلما زاد الاتساع تاه به الضحك.كيف توقع أن تضحك عيون مفتوحة ؟!علام يا ترى؟! أرخى الجفنين قليلا وكل ما طل نظرات عتاب لا ينقصها سوى دمعتان ويجسّد الحزن في وجه تأكد الآن أن التعاون الجاد بينه وبين الريشة لن يثمر عن ضحك يذكر فترك لها أمر أنامله ولترسم بهم طيور وأزهار ملونة كما تريد ولأنها مرحة رسمت له وجه بلسان مطل في سخرية.

10‏/07‏/2008

واجب


دبسنى الروائى المتميزمحمد حلمى مخلوف صاحب مدونة لمحة من حياة الكائن صفر الكائن صفر فى الواجب بصراحة فى الاول فرحت بما انه اول تاج ليا بس بعد كده اتأكدت انها تدبيسة
الواجب له قوانينه مش اى كلام يعنى
1-اذكر اسم من طلب منك حل هذا الواجب
2اذكر القوانين المتعلقة بهذا الواجب
3-تحدث عن ستة اسرار قد لا يكتشفها من يقابلك للمرة الاولى
4- حول هذا الواجب إلى ستة مدونين،وأذكر أسماءهم مع روابط مدوناتهم في موضوعك
5-اترك تعليق في مدونة من حولت الواجب عليهم، ليعلموا عن هذا الواجب

ستة اسرار اللى يقابلنى اول مرة لا يكتشفها همممممم كلى حيبقى سر يعنى انا مع نفسى بقالى عشرين سنه اهوه وباقابلها كل يوم وبرضه باعتبرها سر عنى
ومحتاجة كتير عشان افهمنى
بس بوجه عام
اولا :مش حيعرف انى عادية جدا يعنى كتير لاول مرة يشوفنى يفتكرنى مغرورة وانا على العكس تماما باعانى من متلازمة نقص حاد فى الثقة واعراضها للى ما يعرفهاش عدم الاحساس بالنجاح والتأنيب المستمر بانى كسلانة (حليت الواجب متأخر اهوه) ومش بانظم وقتى وفيا كل العبر من الاخر
ثانيا: مش حيعرف ان اكتر حاجة بافكر فيها ازاى اشكل نفسيتى من الرضا فى اطار المجاهدة مش عاوزة اكون حد مش بيقدر النعم وفى نفس الوقت مش عاوزة افقد طموحى للاحسن
ثالثا: مش حيعرف ان حلمى الكبير انى افتح مكتبة شبه مكتبة ميج ريان فى (you've got a mail)على اساس انى فى طب فالمفروض ان هدفى عيادة مش مكتبة
رابعا: مش حيعرف انى باحب صوت فيروز اكتر من اغانيها وانا اصغر كنت باسمعها من غير ما افهم لكنتها اللبنانى حبا فى الصوت وانى لحد دلوقتى باكتشف كتير فى اغانيها كنت مش فهماه
خامسا :مش حيعرف انى مش باعرف اكلم البحر ولا هو بيكلمنى ومع انى اسكندرانية ومرتبطة بالبحر جدا بس عارفة انه مش بيكلم حد ومش بيضحك لحد وانى لما احب احكى مش باحكى له باحكى لبابا وان اكتر حد فهم حكاياتى ماشفنيش واكتر ناس شافتنى مافهمتهاش
سادسا :مش حيعرف انى متقلبة المزاج جدا وان مشاعرى حادة ومع انى كويسة فى مشاعر نص الملعب بس بتتعبنى يعنى مثلا دراستى مش باحبها ومش باكرهها باخليها دايما فى النص وده مش سهل عليا
المفروض دلوقتى ادبس ستة معايا فى الواجب منى لله بقه
رجاء خاص ما حدش يدعى عليا لو لقى الواجب صعب
1-محمد عصام مدونته استراحة http://estraha.blogspot.com
2-آدم المصرى مدونته فى عمق الحياة http://3mkelhyah.blogspot.com
3-محمود ماجد مدونته شخابيط http://shkhabit.blogspot.com
4-عاشقة الحب ومدونتها مدينة الحبhttp://madenatalhob.blogspot.com
5-حدوتة هو حدوتة و مدونته حدوته http://7adoota.blogspot.com
6-مرايونيت مدونتها هلاوس ما قبل النوم http://marionette-m.blogspot.com

04‏/07‏/2008

حيرة


"آه ......يا رب.....بسم الله الرحمن الرحيم "تتمتم بادعية آخرى لم اسمع منها سوى همسها "التشريط شديد يا شيخ" "سامحينى العمق والالم ضروريان للعلاج" .تتوجع ..........يدى بين يديها تشدها كلما زاد الالم .يدعونى بابنته ........يريدنى ان اعقم القطن لاطهر جروحها .رائحة المكان.......سخونته ........حوض السمك.......صوت كمبيوتر يعلن عن شيخوخته........امواج متلاطمة تبعث لنا بصوتها.خارج منزله _الذى يذكرنى باسكندرية ريا وسكينة _شاطىء لم تعبث به يد لتميت موجه...........حرارة المكان تزداد وهو مصر على غلق النوافذ ........توجعها يزيد كرهى لمنزله .افرغ من تطهير الجروح ليشرع فى احداث اخرى.لا تدرى متى وبالتحديد بدأ الالم لكنها تعلم جيدا انه لم يهدأ من حينها ..........التهاب فى عِرق النسا ،لم يخطىء فى تشخيصه احد.اخبرنى الشيخ انه سمى نسا لانه ينسى ما سواه اعلم فحياتها توقفت عنده .مواعيد اطباء.....كشوفات.........اشعات .........تحاليل.....روشتات........حقيبة المسكنات سوف اتبرع بها.جربت الكثير لكن هيهات.كيف اتركها لموسه؟ .شهادة الطب برواز يزين الصالة فى بيتنا وكتب المنطق مكدسة بالاكوام فوق مكتبى تتعجب منى كيف وافقتها على المجىء,لكنه طب نبوى........الحجامة موروث دينى.........لا الحجامة طب نبوى.اشرح لى يا شيخ كيف تسكن الالم "نخرج الدم الفاسد"ما الذى افسد دمها؟؟! المتكسر اكيد يعنى الدم المتكسر. "التشريط ينسى الم العِرق"واحدة بواحدة اذن ,ألذلك سمى الانسان انسانا؟!.تستند على يدى .نتنفس الصعداء خارج منزله.البحر كما فطره الله لا اروع.أيمكن العلاج بالفطرة؟ وكيف؟ ليس المهم كيف المهم الشفاء لن اتحمل ألمها .تتوجع من جديد تُرى أى الاألمين يذكرها بنفسه الآن؟؟

29‏/06‏/2008

حدث بالفعل




تضيق عينها ......تشد الورقة بيديها وتنازع عليها المراقب "لسه ما خلصتش .......حرام عليك .............والنبى" تشعر بالكرسى الذى تجلس
عليه يهتز ومازالت تشد ما بيدها "سيبى يا بنتى" تختلط عليها الاصوات لا يمكن ان يكون لهذا المراقب الاصلع ذلك الصوت النسائى
تكاد الورقة تفلت من يدها ومازال الكرسى يهتز بعنف تصرخ بقوة "بطل تهز الكرسى يا اصلع" يرد عليها نفس الصوت
"اصلع مين يا بنتى
سيبى هدومى"
تهب مفزوعة فبعد مناورات امها لايقاظها بدأت تخرج من متاهات عقلها الباطن وتفيق لتدرك انه يومها الكبير........
ثانوية عامة ........فيزياء ..........تود لو تعود للمتاهات فذلك اسهل مازالت يد امها تهزها لتستعد للنزول.احضرت الكراسة التى جمعت
بها اخر ما تود قرأته والتى اصبحت فى النهاية كتاب فيزياء لكن على صغير .تصفحتها سريعا فى السيارة وعلى باب اللجنة اخذت تعد العدة
الاقلام موجودة المسطرة موجودة الآلة الحاسبة موجودة .تسمى الله وتستعين به على شقاء الثانوية العامة الاذلى المكتوب على جبين المصريين
كاثبات جنسية ........تتأكد ان لا مراقبين صلع وتحمد الله .تستلم ورقة الاسئلة .لم تتعود ان تقرأ الورقة كلها بل تحل سؤال بسؤال ولاول مرة
تدرك انها عبقرية _للحق الكثير من المواقف خلال ساعات الفيزياء الثلاث اكدت تلك العبقرية_فنظرة سريعة لصنابير دموع من حولها جعلتها
تضيق عينها بشدة كعادتها عندما تفكر واصبحت لا ترى شىء سوى الورقة.تعرفت على السؤال الاول لكنه تقبلها على مضض
. وفى الثانى حدث بينها وبين السؤال صدام شديد ادركت شدته بحق من الشهقات المتتالية والمناديل التى ترمى
فى كل جانب .الاعصار فى السؤال الثالث اطار ابراج العقول الباقية خارج اللجنة والمغناطيس المغلق جذب معه البعض ارضا فى حالات
اغماء متكررة وكل ما حولها يدفعها دفعا للبكاء ولو على سبيل المشاركة الوجدانية لكنها لم تكن هنا بل فى احدى متاهاتها حيث اختها الكبيرة
فى كلية الطب والتى تعانى مثلهم وألعن خصوصا فى ايام الامتحانات واخذت تقنع نفسها
"يا بت الموضوع مش مستاهل بصى للمراقب كده فى
غمضة عين شعرك حيبيض زيه ولا الهوا كبرى دماغك حلى الى تحليه والى مرضاش هو حر"
فلسفة تكبيرية على وتيرة كبر الجمجمة ابقت
عينها جافة وفى صراعها مع السؤال السادس دخلت يد المراقب كشريك متضامن مع السؤال واخذ يشد الورقة من تحت يديها وهى تستوقفه
"
ثوانى طيب كلمة واحدة بس بطل تشد الورقة يا ابو شعر ابيض ....خلاص خدها"
ينتزعها المراقب بغيظ مكتوم ويقول بصوت يسمعه زميله
"ربنا يكون فى عون العيال دى حتى الى معيطتش اتجنت"

25‏/06‏/2008

انحدار



كتلة زجاجية تتدحرج من تل ليس بالكبير وليس بالصغير

مازال ارتفاع ومازالت احتمالية الاصطدام كبيرة

تحتاج معجزة لتهبط بسلام

المعجزات تراث
تراودها خرافة معجزة الحاضر تبطىء من سرعتها لكن الجاذبية لا ترحم

تتوقع الكثير ان يسندها احدهم ان يتلقاها اخر

تدور على نفسها لتظهر اقصى لمعانها علٌه يجذب احد

لكن لا مجيب وبالتالى لا امل

تترك امر نفسها للجاذبية فكما يبدو هي فقط من يريدها

تلتقيان فى حرارة تتهشم على اثرها الكتلة فتات صغير

مازال ينتظر ان يجمعه احدهم او على الاقل يُرى.