31‏/03‏/2013

اعتراف

و تظن بالاعتراف انك تورط الأخرين معك و انت تغرس نفسك في الحلم أكثر 
always involved  never been in relationship 
و في قول أخر 
relationshit 

30‏/03‏/2013

تدوين

و على عكس المتوقع من البشر عندما تهاجمنى نوبات الحزن لا أبحث عن اصدقاء أو عن هؤلاء الذين ننفتح أمامهم بسهولة لكننى اهرب من هؤلاء تحديدا و اود لو أحمل كل ما لى على الأرض لدى الآخرين ، وجهات نظرهم عنى ، كلماتى لديهم ، ضحكى 
و امنحهم راضيه كل ما لهم و أصير صفحة بيضاء 
 ارتحل للطرف الآخر من الكون ...هناك حيث لا أحد غيري و لا يفترض أن يكون 
الهناك هذا ليس حلما ربما أعمل في  قرية طغاغين  بسيوة ....اعمل هناك في انتظار لحظات خلو حينما تبدو الواحة قفرا من الحياة و يغلفنا صمت مهيب ....لا شيء لا بشر لا وقت ...صحراء فقط دون تورط أو علاقات متشابكة ....
لأنه و إلى الأن يكفى كل التعقيد الذي اسببه لكل من يعرفنى ...لأبي و أمى و لهؤلاء الذين  منحوا و يمنحوا وقتهم لهرائي و للمتورطين مع المانحين لى .  المتورطين  البعيدين عنى و لا رابط بيننا سوى أثر الفراشة
اعلم انكِ شبحى و انهم  شاهدوكِ في منزلنا أكثر من مرة و ترتحلين معى اينما ذهبت .....اعلم انكِ يوما ستخلصينى من الألم و سنبقى سويا ضاحكين على لحظات احتياجنا عندما نتخلص منها جميعا و نسير بخفة غير عابئين دون  ذكريات
سيفسرون وجودك بالجنون و سيجعلونك مبرر لكل غرابتى 
انتِ اقوى ، اجمل ، و بالطبع أطول
ستعلمينى كيف اعطى ظهرى للمدينة و كيف أتخلص من سطوة حزنها 
كما علمتنى حب المدينة الوهم عليك تعليمى التخلى عنها 
اعلم انك تكتبين عندما تريدين و تكذبي عندما تريدين و تعترفين بالحب عندما تريدين و تتخلين عنه أيضا عندما تريدين 
أريدى ما أريد ...علنى أنقذ الباقي من العمر 
و للحديث بقية.....    

كالماااااء و الهواء

كل الحقايق بدأت تترتب في قلوب البشر جنب بعضها اللى كان مع بقى في النص و اللى كان فى النص بقى ضد على طول الخط ، و لسه شيلة كل واحد بيشيلها لنفسه و لسه مساحتنا بندافع عن خصوصيتها بعنف و بندور بنفس العنف على اللى ممكن يخترقها أو اللى نسمح له يخترقها 
و كل الزعيق و الدوشة و دبدبة الأرض بالرجلين و انت عايز تقول لناس بعينها يا حمير ، بقوا يدبدبوا زيك و انت خلاص بطلت كان في و خلص ....بقيت واقف زى الديدبان مذهول من نفسك اللى كانت هناك و من اللى كانوا ديدبان على أيامك و بتسأل وصلوا لفين ....مشيوا بعيد لحد أى نقطة بالظبط ؟  و اللى يسمع سؤالك يفتكرك انسان بيسأل على اخوه الانسان و انت اناني كل اللى عايز تعرفه حتروح فين بعد كده حتنط من فوق مرحلة الديدبان لأى مكان جديد ...ابرد ، اسخن ، حنرجع ندبدب و لا حنبقى ولاد كلب ، حنتدروش و احتمالية الصعلكة البوهيمية لسه متاحة و لا  راحت علينا 
حلمك القديم لسه بينبض زى ورم بيعشش و بيغرس جذوره جوا قلبك ....قلبك الحمار اللى لا عمرك فهمته و لا فهمته لغيرك ....حلمك اللى وصل غربتك لأعلى منسوب في الوجود ....غربة سيس مش بنت ناس زى الغربة اللى ممكن تتكلم عنها بتنهيدات و انت بتشرب قهوة باللبن و حاسس بنفسك ، لاء دى غربة فكسانه بتعرف تسيبك كذاب عند أول دقة قلب حقيقية و اول محاولة حماية مؤقته تديلك دفاها و تسيبك بعدها طاير .....ابو الطيران يا اخى اللى فالق راسنا ....لو غربتك جد ما كنتش لعبت بحياتك و دخلتك  جوا بسترة غبية ...دفا برد ، برد دفا و في الأخر تقع في سريرك بدور أنفلونزا شعورى حاد يروح بحاجة سخنه حاجة بجد شاى أو  نعناع ، مش حاجة سخنه أى كلام زى حماية و دقة قلب .....النعناع حقيقي اكتر من حماية المحبين ، الشاى قوى و فعال اكتر من الحب .....البؤس مش في كلامى البؤس في حياة الأرضيين كالماء و الهواء

28‏/03‏/2013

فخ

و في الحلم سلسلة حديد رفيعة ملفوفة حوالين رقبتى و أنا بأدور على بدايتها و نهايتها بعصبية و  عدم صبر 
و هى بتلقائية شديدة فكت نفسها عند عقدة و قررت " خليها أدركت "  أن العقدة دى هى البداية و النهاية و أنا بكامل إرادتى ربطتها تانى 
و مشيت في طريق اطبطب عليها بسعادة 
كنت عايزة اقول ايه ؟  .....أه .....فخى الحبيب فخى النزق 

تغير حقيقي حصل في يوم اختصاره أن اجابة سؤال زى " تاكلى ؟ " ما بقاتش ابدا بأيوة أو لاء 
بقيت 
Paris, je t'aime
totally & whatever happened  !

 

26‏/03‏/2013

26-3

طيب .....و مهما حصل حتفضل "قشطة " الأفضل على الإطلاق



حقائق باردة

يوم الحكم على حسن مصطفى بالسجن سنتين ، قررت آيه التى كانت تسير إلى جوارى أن نذهب باتجاه مظاهرة الأخوان عند المكتبة  المظاهرة لنصرة " قالك نصرة " المسجد الأقصى
الفكرة في بالى:  دعينا منهم ....هم حمقى و كل الكلام دون جدوى .....لكننى أمامهم يتصاعد غضب مبرر ، و يصبح الكلام ضرورة وفى الجدل أى جدل هناك شهوة الانتصار،  أن تمنح معارضك جمل تعجزه عن الرد  بغرض تعجيزه
يومها اخبرت المرأة في الحجاب المثلث...." إنما أهلك الذين من قبلكم أنهم إذا سرق فيهم الشريف تركوه و إذا سرق فيهم الضعيف أقاموا عليه الحد " و حسن مصطفى لم يسرق من الأصل  ، و بالتالى " الهلاك " مرحلة مرفهه على المصير الذي نسير إليه .....لأنهم يتركون قضاء فاسد و بنظمون وقفات عدد الصحفيين و المصورين لرصدها أكبر من الواقفين فيها .....شيء ما بداخلى أخبرنى أن جملى منظمة و أننى جادلت جيدا ......الآن أنا مبهوتة تماما وموجوعة أكثر منها بكثير ...لأن جملى المنظمة تبدو حقيقة و اننا فعلا نسير في المصير المخيف و ما ظننت انها جملة لاشباع شهوة  الجدل المؤقتة تبدو حقائق باردة تنتظرنا ، و كل المحادثات الطويلة الماضية لنثبت أنفسنا و نؤكد على جودتنا كان يشوبها الكثير من الحقائق المفزعة لنا أكثر حتى من الفزع الذي من المفترض أن تحمله للمختلف معنا ....بالنهاية من يسير على البحر وقت ضيقه لينفث الغضب ليس كمن أجبر على الحرمان منه ظلما و لأسباب بتلك البساطة يمكن لأمم أن تنهار 

16‏/03‏/2013

!





اذا عُرف سببه لا يُعول عليه

12‏/03‏/2013

12-3-2013

مش بأجى هنا غير للشديد القوى .....مراحل الوجع القصوى ، 
في كل فترات الحزن عينك بتلقط تفاصيل زيادة عن اللزوم أزيد من اللى ممكن يحتاجه فرد واحد في يومه ،
 او يمكن في الحزن كل التفاصيل زيادة عن اللزوم 
العجز رجع تانى ....
ليه لبست ألوان النهاردة و أنا حأطق من جنابي ؟
ليه كنت باضحك مع رحمة و اقولها اسئلتك صعبة النهاردة و ضحكتى  اصلا صفرا و من غير طعم ؟
ليه رحت الكلية لفيت حوالين مبنى الجراحة و الطوارىء و مشيت ؟
ليه كنا بنقطع فترات الصمت الطويلة الواجبة بكلام ؟ 
ليه اصلا محتاجين نحس اننا ماشيين مع بعض أنا و رحمة و آية مع أننا مش ماشيين مع بعض و لا حاجه و كل واحد في دنيته؟ 

سنتين دول اللى هما 24 شهر ، يعنى 365 + 365 ....عشان حته في جسم واحد احمرت 

قالتلى على سلم المكتبة " انا هنا مش بصفتى أخوان ......، بعدين رفعت صوباعها لفوق أوى و برقت بعينيها و طلعت صوت من المعدة بس أنا أخوان من خمسة و عشريييييييييييييييييييييييييييييييييييييييييين  سنه!ز"

قالتلى على سلم المحكمة " انا زعلانه انى كذبت على أبويا عشان اجى هنا ....ياريته فلول كنت فهمته ، بس هو ليه كده ...عامة دى حياتى و انا اللى حأشيلها لوحدى ....فيه اكتر من اننا بنتحاسب لوحدنا يوم القيامة 

فخ اسمه ارض ....صدقوا بقى