27‏/10‏/2008

kitsch

الكيتش عرفته من الويكيبديا وغيرها

المبهر فى الكيتش ان مالوش قالب يعنى عيش عرفه زى ما تحب الشائع انه بديل مثقف لكلمة بيئة
حيث انها اصبحت فى حد ذاتها بيئة والكل بيقولها .
الكيتش يعنى لا نعدكم بالافضل فى الغالب لانعدكم بشىء على الاطلاق .
كيتش يعنى جملة جات غلط فى وسط الكلام زلة لسان.
يعنى حدوتة فبركها صحفى عشان لازم يكتب حاجة لانه بياخد فلوس .
يعنى قصيدة اتلزقت عشان مضطرين نملى صفحة ثقافية فى مجلة.
يعنى الحبيبة تطلع ام البطل فى اخر الفيلم زى افلام حسن الامام .
يعنى جوابات مراهقين متعطرة ومليانة كلام غزل على شاكلة
(انتِ اجمل بنت فى الدنيا) و(أرى الشمس في نور عينيك)
( يا ملاك نازل من السما)( يا شمعة تنور (مش تنير) ليلي المظلم) .
يعنى( انتى ليلى وانا قيس) والجرى للى عاوز يلحق الاتوبيس.
يعنى مشاعر زيادة عن اللزوم واللى يزيد عن حده ينقلب ضده والسكر الكتير بيموع النفس.
الكيتش يعنى الرومانسية الساذجة تهمة... ماركة مسجلة على جبين صاحبها.

الكيتش يعنى كتاب رمد 400 صفحة يخلص بتركيز فى اسبوع .

يعنى

round
اربع ساعات يتشرح فيهم ساعة ونص والباقى مستنيين الدكتور يجي.

يعنى الآدميين عينات احياء او اموات .

يعنى طب مش باحبه ومش عاوزة اشتغله
يعنى اخلص شيكاغو كلها فى 3 ساعات
واقرا ورقة واحدة فى الكاتاركت
(cataract )
فى 3ساعات برضه .
يعنى فى سنة اولى وتانبة ايام الامتحانات اقضيها عياط وحرق اعصاب
وتالتة فى الفارما اسهر جنب الموبايل شغال على اذاعة القرآن الكريم احفظ واسمع من غير دمعة
يعنى فى امتحانات الباثولوجى احفظ على صوت الضحك والنكت للعرسان الجداد
فى الشقة اللى تحتنا وهما جايين يقضوا شهر العسل فى اسكندرية.
يعنى تعدى السنة بجيد جدا وانا مقضية نصها على الماسنجر باتكلم
واتعلم الدرس فى النهاية
easy come easy go

والكلام عن ضعفك مايبقاش مع اى حد والافضل بلاش الكلام عنه خالص .

الكيتش يعنى تمسك قلم عشان تكتب قصة واقعية فتطلع خرافة وفيلم عربى قديم

الكيتش انك تقول عاوز ابطل كتابة فيكتب قلمك لوحده حاجات ما تتخيلش انها تطلع منك


http://en.wikipedia.org/wiki/Kitsch


http://www.merriam-webster.com/dictionary/kitsch


هناك 6 تعليقات:

محمد حلمي مخلوف يقول...

مستحيل تبطلي كتابه
لأن ده داء مالوش علاج خاصة للموهبين وانتي موهوبه بجد
ربنا يوفقك في الامتحانات

ست الحسن يقول...

أول مرة أعدي من هنا

واتفاجئت جداً بشحنة الإحساس اللي موجودة في البوست ده

بجد أنا مبسوطة ان لسة فيه ناس بتكتب كلام من قلبها لدرجة اني فاهمة الحاجات اللي بين السطور

عارفة ان محمود عزت قبل كده كتب قصة عن الكيتش اسمها نادية موجودة ع البلوج بتاعه

بس طبعاً مختلفة جداً عن اللي انتي كاتباه

تحياتي
لكتابتك العميقة

حـــــدوتـــــة يقول...

السلام عليكم

انا حاسس باللى جواكى وعارف انتى عايزة تقولى ايه
وانا برضو مريت بفترة زى دى وفضلت فيها اكتر من سنة
بس صدقينى كل حاجة بتتنسى مع الوقت
وانتى اللى بأيدك تنسى او تحولى تنسى
اما موضوع انك تبطلى كتابة فده اكبر غلط ممكن تعمليه
وانتى اكتر واحدة هتخسر فى الموضوع ده
قربى من ربنا وادعيله

سلالالالالالالالالالالالالالالالالالالالالالالالالالالام

كلام وخلاص يقول...

محمد حلمى:ماينفعش اقول بعد كلامك اى حاجة
****************************
ست الحسن :غادة انا سعيدة انك فهمتى قصدى وحسيتى بيا ولسه في ناس ياما بتكتب من قلبها وبعد ما زرتك عرفت انك اكيد منهم
شكرا بجد لرأيك
عارفة طبعا نادية فى بلوج احكى لمحمود عزت دكتور محمود اصلا من كتابى المفضلين عشان ببساطة بينقل واقعنا بمفردات افضل اما بالنسبة للاختلاف فنادية رسم محبوك ومهارة حبكة واسلوب سلس واصابة مباشرة لمفهوم الكيتش اما انا فبافضفض بس
*****************************
حدوتة :
كلنا بنمر بفترات صعبة وفعلا القرب من ربنا هو احسن حل
مشكلة فعلا انى مش من اصحاب النفس الطويل
شكرا ليك يا حدوتة

ahmed_k يقول...

بجد يا أسماء حيرتيني معاكي
بتكتبي حاجات صعبه
يا دكتوره في ناس أميين بيتابعوا مدونتك
حرام عليكي هههههههه
بالنسبه للكيتش انا أول مره أسمع عنه عندك هنا
وما دام كما قلتي فهو نوع من التملق
والنفاق الزايد


تقبلي تحياتي

كلام وخلاص يقول...

احمد ذكى الدين: خير ليه بس الحيرة كلامى مش صعب ده مجرد فضفضة مش اكتر
انا سعيدة جدا بمتابعتك للمدونة وده شرف ليا اكيد