برجاء الهدوء

انا بحب الأغنية دى عشان بتفكرني ب

inguinoscrotal hernia

و بشوارع وسط البلد الصبح الفاضية من البنات المتلكعين اللى ممكن يضيع يومهم عشان طرحة بلون الأكلادور الجديد بتفكرني بالأرامل المسحيين و صلبانهم الصغيرة و فساتينهم السمرا ......حزن على اللى راح أو خرس للى عايشيين مسندوين على شباب و عيال بالرغم أن أجسامهم عفيه...... بيعدوا إشارة صلاح سالم جري بالرغم أن الدنيا لسه هادية.....

بتفكرني بطعم آيس كريم الفراولة السايح من الخنقة بالرغم أننا كنا ربيع .....

ساح من نكت المطري المتعادة و من الشمس اللى حتروح فين عن قفا الفلاح ......بتفكرنى باللى بيلسوا قمصان اللاكوست و نضارات نظر يعدلوها على عينهم كل ثانية و يمسحوها كل ثانيتين

باللى بيدفنوا نفسهم جوا لاب توب في نادى المهندسين عشان يخلصوا المشاريع...... باللى بيكتبوا ورقة " برجاء الهدوء أوضة مذاكرة" و بعد ما يخلصوا اللى وراهم هما أول ناس لا بيلتزموا بالرجا و لا بالهدوء .....

بتفكرني بأول مرة ركبت المترو و كنت حأرمى التذكرة كنت فكراه زى الترام مش بنحتفظ بالتذكرة غير للذكرى ....بالسنة اللى فاتت لما كنا بنتصور في ميدان التحرير قدام المتحف المصري و الظابط اللى كان عايز ياخد الكاميرا و فضل يتفرج ع الصور و أنا اقوله مش من حقك دى عليها صور شخصية و بمحمود و هو بيقولنا ما هى غلطتكم هو فيه حد يتصور في ميدان التحرير برضه ما كناش عارفين أن مصر كلها حتتصور هناك ......بتفكرني بالموظفات اللى بيقضوا الصبح سايبين كوبات النسكافيه على الشباك يتكلموا في التلفيون معظم اليوم و يتفرجوا على القاعدين فوق في سيتى كافيه ....بحبها عشان ببساطة جدا فيها اكتر كلمة نفسي أقولها